دبابيس /إعفاء المدرب الإيطالي

* اكتب من فراش المرض… .دعواتكم….. وتحيات الصحة والعافية للجميع مريخاب وهلالاب

** الأخ عمر النمير رئيس، نادي المريخ ارجو منك ان تصدر قرارا فوريا باعفاء المدرب الإيطالي وترك الأمر للفاضلابي وناصر بابكر وامير عوض وسامر العمرابي للتعاقد مع مدرب اجنبي جديد ودفع مرتبه وكل مخصصاته و مخصصات بقية أعضاء الجهاز الفني… كرهتونا

** أمير عوض يعمل مدرس بمدارس بحري لا يملك القيد الصحفي كتب مقالة مقالتين وعمل نفسو كاتب مريخي.. عليك الله فكنا وشوف تدريسك وين…. ناصر بابكر لن اتحدث عنه لانه مازال طفلا يحبو في بلاط صاحبة الجلالة ويكتب بدوافع نعرفها جيدا…. الفاضلابي صديقي وحبيبي وكاتب وصحفي معتق .. بس شايت ضفاري ما عارف ليه… بعدين يا فاضلابي استحقاقاتي المادية من صحيفة الزعيم عفيت ليك حتي لا تحاسب بها امام رب العالمين يوم تجتمع الخصوم… سامر العمرابي اشدنا به كمراسل لقنوات بين اسبورت وانه في الحياد لكنه محليا ما قادر يتخلص من مريخيته وما عندو شغلة غير المدرب الإيطالي

** المدرب الإيطالي منح لاعبي المريخ اجازة طويلة وسافر الي بلاده….. الاجازة الطويلة ضارة وليست من المصلحة وما ممكن اللاعبين ياكلو ويشربو ويتونسو
وينومو وده بأدي لزيادة الوزن والأجانب بالذات حيتعبو ولكن المدرب الإيطالي دائما ما يصطدم ببرنامج المنتخب الوطني ويعلن العطلة والحمد لله ان عدد كبير يتواجد في معسكر المنتخب

** مدير الكرة بالمريخ قال.. نفاضل بين تونس والقاهرة لعلاج طبنجة… هو طبنجة ول مدفع ما تعالجو في اي حتة وخلاص

**. متابعاتي تؤكد ان بعضا من أعضاء مجلس المريخ يعانون من ضائقة مالية شديدة بسبب الحرب ولا يستطيعون المساهمة ماديا في دفع مسيرة النادي…ولي عودة

** نادر خليل المدير الرياضي للمريخ قال في تصريحات صحفية امس…. رصدنا عدد من اللاعبين الأجانب المميزين وبدأنا التفاوض معهم… ولم يكشف عن اسمائهم ولا خاناتهم ولا بلدانهم وعلمنا ان عددهم أربعة وهذا يعني الاستغناء عن خدمات بعض المحترفين الموجدين حاليا في الكشف

** المريخ في حاجة لمهاجمين يا سيد نادر

** عشرة من لاعبي المريخ سافرو الي ليبيا للانضمام لمعسكر المنتخب الوطني استعدادا للقاء إثيوبيا في تصفيات بطولة أفريقيا للمحليين من ضمنهم أمير كمال للأسف

** معتصم جعفر لسة ساكي قروش المريخ المحبوسة في الاتحاد الافريقي وفتح الموضوع مع مسئولي الكاف المتواجدين بمدينة مراكش المغربية….. ده فيلم طويل.

** محمد ابراهيم العليقي نائب رئيس، نادي الهلال… لاحظو لنائب رئيس دي… العليقي لصيق جدا باللاعبين.. يغني معهم ويرقص معهم ويهتف معهم ويهظر معهم.. وهذا لا يليق به كاداري وفيه عدم احترام لنفسه ولمنصبه واذا كان فاكر نفسو لسة شافع.. علي الكبار تقويمه ونصحه بأن تصرفه غير سليم

** الاهلي القاهري احرز البطولة الأفريقية خمسة مرات في عهد محمود الخطيب ولم يظهر الخطيب مع أي لاعب ولم يغن ولم يرقص وما فيش لاعب بقابل الخطيب اصلا ولا اي اداري اخر وتعامل اللاعبين مع مدير الكرة فقط.. وعندنا هنا في السودان القصة هايصة.. الإداري يهظر مع اللاعب ويرقص معاه ويركب معاه في عربيتو……. لسه يا اخوانا بدري علينا

** حيقوليك العليقي رئيس القطاع الرياضي ومن حقو يرقص مع اللاعبين ويتناسو ان سعادته نائب رئيس النادي

** كابتن الفريق اي كان هو القدوة لزملائه يوجههم وينصحهم ويتمتع بقوة الشخصية.اولا.. .. وكباتن الهلال من عبد الخير صالح وصديق منزول مرورا بنصرالدين جكسا وعلي قاقرين وطارق احمد ادم ونهاية بسيف مساوي كانو محترمين ومهذبين وأولاد ناس ويتمتعون بأخلاق رفيعة وسلوك قويم ويعرفون مهامهم جيدا وكانو قدوة لزملائهم وتتلخص مهامهم في التوجيه وضرورة اللعب النظيف…. كابتن وقائد الهلال الحالي محمد عبد الرحمن علي العكس من ذلك تماما… يجهل صفات القائد… شغال شلاليت في لاعبي الخصم وبطريقة قبيحة في كل المباريات وفي آخر مباراة بالجزائر استخدم الشلاليت ثلاث مرات وكان من المفترض معاقبته بالكرت الأحمر لكن الحكم الجبان جامله… وحتي تسريحة شعره لا تليق بلاعب قائد… محمد عبد الرحمن يجب اعفائه من قيادة الهلال واختيار لاعب اخر يعرف قيمة ومهام الكابتنية… الكابتنية ما لعب…

** احب هذا الوطن حد الوله ومستعد للموت من أجله ولو كنت اعرف استخدم السلاح وبقدر علي الجري والسهر لقاتلت مع قواتنا المسلحة الباسلة في معركة الكرامة…… حب الوطن حب خاص غير مرتبط بالهلال ولا المريخ ولا اي فريق اخر…. عشان كده ما تنبحو فينا وتخدرونا بأن الهلال يلعب باسم الوطن…. واذا كان ما تدعونه صحيحا بأن الهلال يلعب باسم الوطن وعلي كل الأقلام الوقوف خلفه فالمريخ لعب باسم الوطن وقدم وانجز واحرز البطولات للوطن… ما ريحتوه.. شتمتوهو واسئتو له وسخرتم من إنجازاته و بطولاته وما زلتم تسخرون

** التنافس بين المريخ والهلال لا علاقة له بالوطن

** بعد احراز المريخ
للبطولة الأفريقية سخر منه الهلالاب وقالو بطولة ما فيها الاهلي ولا الزمالك ولا الترجي ولا مازمبي…. وطبعا ده ما ذنب المريخ… وعندما احرز المريخ بطولة سيكافا ثلاث مرات سخرو منها واطلقو عليها دورة المجاعة… والهلال شارك فيها 9 مرات وفشل حتي في الوصول للمباراة النهائية…. وما زال كتاب الهلال وجمهوره يسخرون من المريخ عقب مغادرته البطولة الأفريقية من الدور التمهيدي الثاني….. لذلك الهلال لا يستحق الرحمة ولا يستحق اي تعاطف.. وشخصيا كتبت اروع مقالة عن الهلال عندما انتصر علي الاتحاد الليبي قبل سنوات خلت وقبل الجماعة ما يجو من البلد وكتبت مقالة اروع بعد انتصاره علي الترجي في العام الماضي ورغم ذلك شتموني ووصفو ما كتبته بالنفاق…. وياما كتبنا عن الهلال في مناسبات عديدة.. لكن مافيش، فايدة

** المريخ احرز البطولة الأفريقية عام 89 وايامها كان محمد عبد الماجد تلميذ في الأساس بجبل ام علي والرشيد علي عمر كان لسه طالب بيدرس في الهند وياسر عايس كان شافع. حايم في شوارع ود الماجدي وصديقي خالد ابوشيبة كان طالب في رفاعة و قسم خالد اظنه كان بالمرحلة المتوسطة بالجموعية ورمضان كان بيلعب في رابطة الحاج يوسف وأمين نور الدائم كان لسة طالب في عطبرة وفي اتنين جو من قري سنار قبل سنين قليلة اما ناس رزاز وحبال وموج النهر وسهام حمراء وصفراء وفي خط 17 والامبرطور الأبيض والأسود وهلمجرا.. ديل حتي الفنان فيصل العجب ما شافو خليك من حامد بريمة وسامي عزالدين وزيكو ودحدوح وكل هؤلاء بسخرو من البطولة الأفريقية ولم يشاهدوا الحدث ولم يعايشوه وبكتبو ساكت.. والوحيد الذي عايش الحدث والأفراح هو صديقي معتصم محمود… وشجرابي كان جا جديد من عطبرة وبكتب تحت اسم هلالايات.. اما الاستاذ الكبير الهلالي هساي فقد كان في قلب الحدث وهساي من كتاب الزمن الجميل ودايما ما يكتب عن المريخ بصدق وأمانة واصدر عدد خاص بالمريخ من صحيفة الهلال عقب احرازه البطولة القارية

**’. اغلب كتاب الهلال لا يحترمون
المريخ … لذلك الهلال لا يستحق اي تعاطف..

** صحيفة المريخ لن تكون صحيفة يا صديقي عمر بابكر لو ما هاجمت الهلال وشايف كل كتابها بنفاقو في الهلال مع احترامي لهم……… عندما تم اختيار زميلنا الراحل ميرغني ابوشنب رئيسا لتحرير صحيفة الهلال أواخر الثمانيات استدعاه العميد سليمان محمد سليمان وكان عضوا بمجلس انقلاب الإنقاذ ووزيرا للإعلام..أيامها استدعي ابوشنب وقال ليهو ما عايز حاجة من جريدة الهلال غير الهجوم علي المريخ ومحاربته… يعني ما عندك شغلة يا ميرغني خلاف المريخ وحول سليمان صحيفة الهلال من أسبوعية الي يومية لمحاربة الأحمر.. ونجح ابوشنب في مهمته.. … هسي يا عمر حكاية احتيال اداري من الهلال علي الجمهور الموريتاني دي كان ممكن تكتبتبو فيها صفحات وما هبشتوها بسطر…… مانشيت صحيفة المريخ بعد مباراة الجزائر كان مفروض يكون ( الهلال المحظوظ فاز علي مولدية بضربة حظ) دهنسة ونفاق ما بنفع مع الهلال

** ربطتني علاقة حميمة بحامد بريمة وسامي عزالدين وصديق العمدة لهم الرحمة والمغفرة وكل أبطال كأس أفريقيا أصدقائي واقربهم الي قلبي سانتو رفاعة وعصام الدحيش وجمال ابوعنجة وإبراهيم عطا وعيسي صباح الخير واعتذر لهم بشده ان كان حديثي عن البطولة الأفريقية قد اغضبهم وهم ابطالها وسيبقون في ذاكرة الجماهير لسنوات طويلة

** كانو منتظرين الاتحاد الافريقي يختار الهلال كأفضل فريق في أفريقيا… شوفو المسخرة بالله. .. الحمد لله اللميتو في المركز التاسع

** اطلعت علي قائمة منتخب أفريقيا لهذا العام وحزنت لأنني لم أجد لاعبا من الهلال وحزين كذلك لانه لم يتم اختيار حارس مرمي ولا مدافع ولا لاعب وسط ولا مهاجم من الهلال لجوائز الاتحاد الافريقي

** هذه الهيصة الإعلامية والتطبيل المبالغ فيه لن يفيد الهلال..

** ناس ابوتريكة ووائل جمعة واخرين من المحللين العرب يخدعون جماهير الهلال بل يضحكون عليها

** نهائي دوري ابطال افريقيا منتصف مايو المقبل وننتظر وصول الأزرق للنهائي ..

** واتحاد معتصم كان متوقع اختيار منتخبنا الوطني افضل منتخب في أفريقيا…. حاجة مضحكة

** هسي يا العليقي ما تنومو في العسل.. مولدية والشباب افضل من الهلال فنيا وخطر عليهو في موريتانيا

** الهلال حتي لو احرز البطولة الأفريقية هذه المرة بضربة حظ لن يتساوي مع المريخ لأن المريخ لديه ثلاث بطولات اقليمية

** قريبا جدا نكتب عن الإداري بالهلال والذي احتال علي الجمهور الموريتاني في أكبر فضيحة

** نجوم مولديه قالو… الهلال فريق عادي و متواضع المستوي وسننتصر عليه في موريتانيا…… ما قالو الا الحق

** الأخ مامون بشارة الإداري الشاطر نجح وبدرجة امتياز في مهمته .كمراقب لمباراة الزمالك والمصري في الكونفدرالية والتي انتهت بفوز الزمالك بهدف

** منتخب الناشئين في مواجهة جنوب السودان مساء اليوم بيوغندا وهي المواجهة الاولي ضمن التصفيات المؤهلة للبطولة الأفريقية وننتظر انتصاره

** كل الملاعب التي اختارها اتحاد الفشل لاستقبال مباريات الدوري الممتاز الفاشل قبل ما يبدأ لا تصلح لممارسة كرة القدم… ملاعب لا تصلح حتي كاسطبل للخيول…. غايتو الأندية مصيبتا مصيبة ومفروض يكون عندها موقف

** دوري بدون المريخ ووصيفه الدائم.. لا فائدة ترجي منه

** الزميل عبد الرحمن عبد الرسول بالغ في الاشادة بالهلال عبر إذاعة هنا ام درمان… ولم يقل ان الهلال يلعب بدون شكل ولا تنظيم ولا خطة وماشة معاه

** واحد كلب من كلاب شندي يسيئي لشخصي باستمرار….. عارف تاريخك يا منحط وما تخليني اضطر انشرو…. . ولا عذر لمن أنذر

** غدا بإذن الله نكتب عن الحرامي و المحتال بتاع امبدة……. ؛. امسكو الخشب

** اشتقنا لأحرف زميلي وصديقي الاستاذ علم الدين هاشم

** لم نعرف رأي السوباط في تصرفات العليقي

** ناس لا شفتهم في حياتي ولا شافوني.. شابكني امشي الجامع… امشي المقابر….امشي اقعد في البيت.. امشي وين ما عارف… الحمد لله مازلت في ريعان شبابي وقادر علي العطاء… وفي النهاية الأعمار بيد الله

** واحد طويل وظاهر عليهو اهبل وبكون هلالابي سألني امبارح.ببلاهة.. . انت يا ودالشريف.. محمد وردي كان مدرس….. قلت ليهو لا كان مساعد لوري في خط حلفا.. … .. بالله عليكم في سوداني ما عارف وردي كان شنو قبل ما يحترف الغناء ويصبح فنان أفريقيا الأول والأخير.

** جيت اعاتبك واشتكيلك واشرح الحب من بدايتو
قلبي خاضع ما برافع بس عليك تسمع حكايتو

** اخر دبوس

** في وجود الاهلي والترجي والزمالك ومازمبي كانو ينتظرون تتويج الهلال الأول في أفريقيا….. محن والله..