وضاح ابن الشاعر بشرى يصاب بمرض مفاجئ ووالده يطلب الدعاء له

الخرطوم /جزيرة برس

أصيب الصغير وضاح ابن الشاعر ” البشرى ابراهيم ” مقدم برنامج قهوتنا الشهير بتلفزيون السودان القومي بعدم سمع مفاجئ . ونشر البشرى على صفحته طالباً الدعاء لابنه وضاح بالشفاء من المرض الذي ألّم به . وكتب قصيدة يصف فيها حال ابنه قبل وبعد المرض. وقد وجد منشوره تجاوباً كبيراً من متابعي صفحته وبعضهم واساه شعراً..”جزيرة برس ” تنشر ما كتبه البشرى الأب ..ومجاراة البعض ودعائهم له شعراً

البشرى :

العند الله مكتوب للبدور واليابه
وضاح جاتو واحدتا ولا بتتعابه
بعد القرقراب الونسه قولة يابه
امسي الليله الا نشترو بي درابه

يا اب نضما متل نسمة ليالي الصيف
آت في الهاويه م بتسمع نغيت القيف
جانا العيد وانت مع الصغار بتقيف
بشريلك مسدس الا تسمعو كيف ؟؟؟

#######

رد ودعاء أحد اصدقاء صفحته :
بدعيك يا من بي ايدك ليل وصباح
يا من لي حديثك،،،، النفس ترتاح
تكشف الغم وتملاهو عافيه وافراح
رديت بصر يعقوب ما بقلبك سمع وضاح

#######

قال آخر :

شاحد ربي الشافي غفار الذنوب
تشفي وضاح وإسمع مشي العرقوب
يارب يا مجيب الباري علام الغيوب
يرجع سمعو متل رجعة بصر يعقوب

بدعوك ربي خالق الإنس والجان
سمع وضاح إعود لا آها لا حِرمان
بي الصافات وسوره طَه والفُرقان
يعود وضاح إسمع مشي الحفيان

والدك مِنو طلقات الكلاش تتردد
وانت عزيزآ! عز اصلوا ما بتحدد
يارب يا كريم سامع نداء البتودد
وضاح إصبح سامع مشي البتصدد

ود البِنحرو ام زور و رايو سديد
والدك في المعارك مافي متلو نديد
يارب يا كريم يا ربي انت السيد
وضاح إعود إسمع طلايق العيد

محمد الصديق الشريف

#########

العند الله مكتوب اصلاً ولابد منو
والقدر محسوم مابلاويه العبد بي زندو
كل البيحصل خير مدام الأت من عندو
يابشري اخوي اصبر البصبر الله بسندو

الجات في وليدك حتماً اكيد ماكان تمش تغباهو
كلو اختبار كان موت ومرض وسواهو
ربنا مابختبر العبد الا كان حباهو
اصبر علي المصاب باكر الوليد بشفاهو

“جزيرة برس ” تتمنى الشفاء العاجل للإبن وضاح