الطيب عبدالماجد يكتب عن سفير الأغنية السودانية ،الفنان القامة عبدالكريم الكابلي

سيد ( الرصة )

سفير الأغنية السودانية وصوتها المثقف ….وفنانها المعتبر
( عبد الكريم الكابلي ) ….!!

دا هسا يكتبو عنو من وين ….!!؟

صوتو …ولا أغنياتو …ولا كلامو …ولا أدبو ….ولا لطفو …
أم البهاء …!!

( الكابلي ) بنحس بيهو سفير حقيقي للأغنية السودانية والفن السوداني بحضورة الآسر وصوته الفخيم
وكلماته الساحرات ….!!

( كابلي ) دا بدينا إحساس حقيقي بالسودان الجميل
تنوعاً وثراءاً وفنون …..بداية بالأغنية الشعبية
مرورا ( بالطنبور ) ( والربابة ) ( والوازا ) ( والدوبيت ) ( والمسادير ( حتى الغناء الحديث

طاقية وسديري وجلابية …..وكابلي

الكابلي ( جزو ) أصيل من السودان ومن غناهو ومن ثقافتو ومن جمالو …ومن لغتو …ومن أي حاجه …!!
يتقاسم معنا التاريخ والجغرافيا ….
وأفراحنا ….!!!

( كابلي ) لما يغني بغني لي أي زول …!!

بغني لي سودانية سمراء بتعمل في ( الغدا ) وتسمع في فيهو عبر أثير موجات ( الراديو ) فتركب موجات كابلي وهو يصدح
بقلبي والاحاسيس بأدق المشاعر
وللأيام وعمري وكل عزيز ونادر
زينة وعاجباني

فيملأها إحساساً وشجن وتعبر للضفة الأخرى ..!!

وإذا طبخت بما يلامس ( السقف )بتقول ليك عملت
ملاح يغني عليهو ( الكابلي ) 🥰
حيث لم تجد ماهو أجمل من هذا التوصيف….وكلاهما ( طاعم )

وأخرى في طريقها للعمل ..وكابلي يداعب مخيلتها
وأي صوت زار بالأمس خيالي …!!
فترد عليه في نفسها ….( إنه صوتي أنا) ….🙌

وثالثة تكاد الغربه أن تفتك بها فيأتي صوتك عابراً للقارات مطبطباً …ومؤانساً …و ( قريب )

( وغريب والغربة أقسى نضال )

( كابلي ) فنان النخب والمثقفين من أجيال نهلت من معين الثقافة وارتوت …!
مكتبتهم فيها صنوف من الكتب تكفي مؤونتها ل ( تتريس ) جيل …
وتراه أمام ( كابلي ) صامتاً وجل وفي الأفق يصول ..

تهتز دواخله المتخمة بالمعرفة عندما تعلو آهات كابلي وتهبط وهو يعيد الكره مرتين في ( ضنين الوعد )
لتلامس الآهات سقف السحاب والشجن ….
وخيال الشعر يرتاد الثريا …!!

وأنا إن شئت فمن أعماق قلبى أرسل الألحان شلالاً رويا
و أبث اليل أسرار الهوى و أصوغ الصبح ثوباً بابليا

( صديق مدثر ذاتو بالغ )

( كابلي ) فنان الشعب وهو المتبتل الغارق في تراثه
وتفاصيله العاشق لإرثه ..المتبحر في سودانيته يضرب ( النوبة ) معه في ساحة ( المولد ) البهية فتئن وترن ….ويحلق معه العاشقون دراويش في حضرة المكان ….وسر الليالي

( كابلي ) عراب الوطن فعندما ( يطلع ) في عتبات ( سلم ) الموسيقى نرتقي معه سلالم المجد …

وإنتا عندي كبير… و حبي ليك كتير 💞

والله إنت ذاتك عندنا كبير شديد يا كابلي وحبنا ليك كتييير
إلا حال الدنيا …💔

كابلي فنان المحبين وملهمهم عندما يغني بحسو إنو بغني ليهم هم بس ….فينفجر شلالًا رويا …..

بجهجه العشاق ويكشف عن شعورهم بمجرد أن يلامس صوته المشحون دواخلهم الملتهبه
والحالة بتبقى صعبة …
فحسك يخترق المستور يا كابلي وينال من عاشق متخفي نال منه سهم صوتك فأرداه ( أسيرًا ) يعترف …!!
وحبيبة عمري تفشى الخبر و وذاع و عم القرى و الحضر

كل فئة تشعر بأن كابلي هو فنانها …فيستدير الرجل
ويأتي بأغنية من جوه توسع ماعون المعجبين وتؤكد علو كعبه

وعاشميق حبل الوجج أنا أبوي مقدام الحجج�يسلم لي خال فاطنة ليهن بلالي البدرج العاطلة

فينتقل من صالون المثقفين لي حيشان أولاد البلد
بسلاسة وجمال وحرفنة وفي الاتنين ( بتحكر)

ياخ لما غنى مبروك عليك الليلة يانعومة في ( مباراة ودية)
ارتقت ( نعومة ) من ( دلوكة ) البنات لي ( بدلة ) كابلي
لاعرفت ترقص ولا عرفت تميل ….
ولسان حالها يقول دا عرس ولا تخريج ….

غناها بي مزاج وغنا البنات في السودان ( لذيذ ) وعفوي
وبنقل الصورة حية وبدون مكياج
وكابلي كان غنا اي أغنية بتجيب زيت

وعلشانك انت البتتحمل أذانا…ترحل بي جسمك وخاطرك معانا ….!! 💃 ومبروك عليك الليلة يانعومة …!!

( نضمن والله )

ومبروك مرتين يا نعومة العرس وكابلي …

كابلي فنان كل الناس وحبك للناس خلاني أحبك تاني
وأنت الحاضر في وجدان شعب وضمير أمة…

الوطن الذي أحببت تتقاسمه المحن والتقاطعات في
هذه الأيام ….لكنك غنيت
( شان البت سعاد أصلي عارف جنها في زول بيركز ويتستر ) ….!!

نبشرك يإننا راكزين ..!! ✌️لكن تعبنا والله يا أبو سعد
الخرطوم الغنيت ليها ….
هبت الخرطوم في جنح الدجي
ضمدت بالعزم هاتيك الجراح ….!!
هي ذاتا مجروحة ..بتصدق 😥

وأنا لو تصدق
يا شباب عمري المفتق
شلت كل الريد مشاعر حلوة نديانة و خصيبة
و اشتهيت يهلّ وعدك لي هنا أفراح وطيبة

( وفضلنا وحاتك منتظرين ) ..

مش قلت ليهم شيلوهو وعلوهو وأبنوهو وطن الجمال …
والله ولا واحده يا كابلي …!! 😥
لكن الله في ….شدة وتزول … وإن شاءالله بنقوم

و بوفا النيل في دمانا نبني جنه
و نبتهج نحنا و صغارنا و نتغنى
يا أصلنا و مبتدانا يا حلاة مسرح صبانا وذكرياتنا و مشتهانا
إنت فينا كبير وريدنا ليك كبير
القومه ليك يا وطني

وانت وطن يا كابلي …..

شفت بنقدمك كيف الناس بره ….تحكي ليهم عننا وعن ثرائنا وعن أساسنا…وعن غنانا وعن أرضنا وعن سمانا..
بالعربي والانجليزي …..والمشاعر ….!!

( كابلي ) قيمة كبيرة في تاريحنا الفني وواحد من الكبار
بابتساماته الرزينة واختياراته العبقرية وصوته المتدفق

سر ( كابلي ) إنو الجميع يستمع اليه وبذات الاحساس
وعبقرية كابلي إنو فنان كل الناس

مضى وترك الحب والجمال ….!! وكثير ود ..وسلام ….!!

وماهو عارف قدمو المفارق …يا محط آمالي السلام

صحي يا مهذب ….!!؟🌹🙌