مراتع الحن …الشوق للبلد

ابراهيم احمد جمعة

شدرة السيال ساكنة لا حراك
فيها كأنها تبكي زمانها الفات
تشكي وجعة الحال.
🥀سافورة القش تدلي بعد مسير طويل في خلوة على ود جمعه وقراءة
أهل المسيد تنعش الخاطر
المكسور بفعل جروح الازمنة
وصوت العصارة وحنين
ينساب بين صرير حركة
الجمل مغمض العينين وهو
يدور في متاهة الهم
القديم وجالون شل المعبأ بسمن البقر يحكي عن وداعة
بت جادالله وتصبح غناوي
بت نصرالله تثرية الزمن
الجميل مابين خور الهجليد ودوينقا.
🥀وبطر الصبيان يقودهم لنصب شراك البلوم عبر الشبك المنسوج من خيوط
العصب او شراك الكشمبيرة
المصنعة من فروع نبات المرخ بسبيب البقر وكأني
بهم يغنون مع ود متيرب
قوله:
مهرك يا العيونك ليا
شايله
محبه
بدفعو كان ابوك نقص
المطالب
حبه
سمسمي كلو والعيش
والتمك بي
حبه
حتى الجوجو ان
دايراهو داكو
معبأ
🥀وتصبح المشارع والاضاي مساحة اللقيا الاجتماعية في زمان أصبحت الخطى كأنها معطونة في لقاد الأرض
🥀الرباعية تلك فتحت نفاج الذكريات حينها كان الشباب عمليا لا يستكين يجتهد
في البحث عن العمل حيث
تأتي الزراعة في المقدمة ولكن الجفاف قولا اخر
واقول:
شليل وين راح
اكلو
التمساح
حس الصفقه بدقدق
وصوت بنوتا
بغنن
وزولا جدع شبالا
بديع
واتفنن
فدع ايديهو دوخ
عاشقو
وجنن
🍁
لكن ماراح في
الزمن
زمنا فيهو القسوه
والغلط
الصاح
وجلسات السر الفيهو
بتبقي
صفاح
🍁
ونسوان الحله قلن
بكريهن
وتننن
نضمن في جاراتهن
وسكتن
صنن
ارمي ودعك يمه
والزول
الشنن
شال نوارو والحكمه
حور
واتحنن
🥀وحور الازمنة الماضية هو قليل الجمال المتبقي في أزمنة الجمال الكذوب مابين
استخدام عقاقير السمنة والتبيض يصبح البعض
كالقربة المورشله
♠️ونعود
🏉كسرة🏉
أهيف كيف صلا
نداوتو
تهتف
تابر خلقه بكل
الجمال
مستف
عانس الظباء الفوق
الوحل
متكتف
وكان للسماح منك
يشيل
ويخطف.

استغفرالله

إبراهيم أحمد جمعة
الأبيض
السبت5/3/2022